Alloga junulino estas vulgara esprimo; Jose Dias trovis pli taŭgan. Li estis la sola homo de malsupre, kiu nin vizitis en Tijuca kaj kunportis salutojn de niaj familianoj kaj siajn parolojn, sed parolojn, kiuj ŝajnis vera muziko; mi ne metas iun el ili ĉi tie por ŝpari paperon, sed ili estis plezurigaj. Unu tagon, li komparis nin al du birdoj vivantaj en du najbaraj tegmentobreĉoj. Vi prezentu al vi la ceteron, ke la birdoj disetendas la flugilojn kaj suprenflugas ĉielen, kaj ke nun ankaŭ la ĉielo plivastiĝas, por ilin akcepti. Neniu el ni ridis; ni ambaŭ aŭskultis emociite kaj konvinkite, forgesinte ĉion, eĉ tiun vesperon en 1858... Feliĉo havas bonan animon.