„Bona laboro. Mi dankas ĉiujn kunlaborantojn pro tiu granda sukceso“, diris S-ro Wallin, kiu gvidis la monatan kunvenon de la firmao. Li aldonis: „Tamen la situacio de la firmao ne estas tiel bona. Ni ne atingis sufiĉajn mendojn el Eŭropo; ankaŭ Usono nur aĉetis kvin robotojn. Se la intereso restos tiel malalta, ni devos fini la produktadon de niaj androidoj“. En la kunveno komenciĝis longa debato pri la kaŭzoj de la krizo. Evidentiĝis, ke ĉefe en Eŭropo, precipe maljunuloj ne ŝatis la androidojn. Ili eĉ timis robotojn. En Japanio estis tute alia situacio. Tie la homoj entuziasmiĝis pri robotoj. Ne ekzistis timoj. En Japanio la socio estis tro maljuniĝinta. Multaj maljunuloj vivis solaj en siaj loĝejoj sen kontakto kun junaj parencoj. Krome mankis flegistoj. Tial japanoj aprobis la helpon per robotoj. En Eŭropo la socioj ankaŭ maljuniĝis, sed pro la elstara enmigrado de la fuĝintoj el najbaraj landoj oni observis malrapidan ŝanĝiĝon. Tial la nombro de la laborantaj flegistoj kreskis. Do, oni ne plu bezonis androidojn en tiu kampo.

Ben atenteme sekvis la diskuton. Ankaŭ por li estus terura afero, se la firmao ne sukcesus. Li rimarkis, ke ĝis nun oni preskaŭ nur parolis pri la uzado de la androidoj por hejma flegado. Li ekparolis: „Kial ni nur konsideras la androidojn kadre de hejma flegado? Mi pensas, ke almenaŭ en Japanio oni certe povus trovi alian kampon“. Ĉiuj partoprenantoj de la kunveno vekiĝis kaj interesite aŭskultis la sekvantajn proponojn de Ben: „En Japanio multaj viroj vivas sole, tute sen virinoj. Tamen ili havas seksajn bezonojn. En Japanio multaj viroj vendas multajn seksajn helpilojn. Ili eĉ pagas altajn sumojn por sekspupoj. Tiuj helpiloj estas tre multekostaj. Ofte la klientoj nur luprenas ilin. Mi pensas, ke niaj androidoj povus esti amorantaj kunludantoj por viroj“.

En la kunveno okazis preskaŭ tumulto. Multaj partoprenantoj strikte rifuzis la ideon. Ili ne volis labori en firmao, kiu okupiĝus pri tia malpura komerco. Aliaj subtenis la proponon, ankaŭ Arvid Wallin, la posedanto de la APH-firmao, estis malfermita al tiu ideo. Li tuj kontaktis la japanan entrepreniston, kiu ankoraŭ ne forvojaĝis, por prezenti la novajn planojn de APH.