3.7.2011

Ĉu la filo freneziĝis?

Judo enkuras la ĉambron de la rabeno kun krioj kaj plorado:

"Rabbi, helpon! Mia filo freneziĝis "!

Rabeno: "Trankviliĝu. Pro kio li freneziĝis ?"

Judo: "Imagu Rabbi, mi eniris lian loĝejon kaj tie… Ho, ve, la ŝinko sur la telero kaj gojino en la lito"

Rabeno (ridete): "Kaj vi opinias, ke li freneziĝis? Se la ŝinko kuŝus en la lito kaj la knabino sur la telero, mi dirus, ke vi pravas. Do, estu trankvila. Via filo estas normala … "

(dankon al Nina el Pollando)

6.7.2011

Sendube

Dum la unua mondmilito eniris rusa policano al juda studejo kaj trovis tie kelkajn virojn, kiuj estis diskutantaj pri la tiamaj mondaj okazaĵoj. Subite unu el ili laŭte kriis: "Granda stultulo!"

La policano ekkoleris, kaptis la judon forte per la mano kaj ekkriis: "Judo, vi ankoraŭ pagos multe pro tio, ke vi insultis la caron!"

Judo: "Ne, mi ne celis la caron sed la germanan imperiestron."

Policano: "Judo! Min vi ne trompos. Se vi diris `granda stultulo` vi sendube celis la caron."

10.7.2011

Karaj geamikoj,

Kiel ni faras ĉiun jaron en julio, ankaŭ ĉi-jare okazos paŭzo pri la dissendado de la judaj ŝercoj.

Espereble ni denove renkontiĝos surekrane dum aŭgusto, sed tio dependas ankaŭ de mia sanstato.

Agrablajn feriojn! Sukcesajn kongresojn kaj aliajn juli-aŭgustajn E-eventojn!

Amike salutas,

Josi (kiu restas ĉi-jare hejme…)

Amo al la patrujo

Enkonduko:

Kiel ni jam diris, multaj sovetiaj ŝercoj identas aŭ similas al judaj ŝercoj. Esploristoj diras, ke la juda humuro influis multe la komunistan kaj kontraŭkomunisman humuron.

Najbaro demandis judon el Rusio:

"Kio estas via sinteno al Sovetunio?"

Judo: "Same kiel al mia edzino."

Najbaro: "Kion ĝi signifas?"

Judo: "Tre simple. Mi vivas kun ĝi kaj revas pri alia."