22.8.2009

Kara legant(in)o,

Mi esperas ke vi ne enuis dum la lastaj 34 tagoj…

Josi

Riparinda preĝtuko

Rabeno Ŝmarjahu rimarkis en la sinagogo, ke la preĝtuko de Simĥa, la tajloro, estas ŝirita.

Rabeno: "Simĥa, ĉu vi ne hontas preĝi en tiom malbelaspekta preĝtuko? Vi estas ja tajloro, do kial vi ne mem flikas la ŝiraĵojn?"

Simĥa: "Mi estas tiom okupata per mia pagata laboro, ke mi ne havas tempon kudri mian propran preĝtukon".

Rabeno: "Se tiel estas, riparu ĝin je mia kosto. Mi pagos al vi unu rublon se vi faros tiun ĉi laboron!".

Pasis kelkaj tagoj kaj la rabeno rimarkis, ke nenio ŝanĝiĝis.

Rabeno: "Simĥa, mi vidas ke vi ne volas perlabori unu rublon!"

Simĥa: "Mi ĵuras al vi, rabeno Ŝmarjahu, ke tiom ŝiritan preĝtukon mi ne povas ripari kontraŭ malpli ol 2 rubloj!"

26.8.2009

La kartludanta bofilo

Grumblis Abrahamo al sia rabeno:

"Mi eraris kiam mi edzinigis mian filinon kun nehonesta junviro. Mi nun volas ke ŝi divorcu de li."

Rabeno: "Kio okazas kun li?"

Abrahamo: "Li ne scias ludi kartojn." *

Rabeno: "Ĉu vi konsideras tion kiel mankon? Mi tre ĝojus se neniu Israelido scius kartludi!"

Abrahamo: "Vi pravas, rabeno, sed la problemo estas, ke mia bofilo ludas!"

______________________________________________________________

* En la parola lingvo (en la jida lingvo kaj ankaŭ en kelkaj aliaj eŭropaj lingvoj) la frazo "Li ne scias ludi" ofte signifas ankaŭ: "Li malbone ludas".

("tiu futbalisto ne scias ludi"; "tiu kuiristo ne scias kuiri"; "tiu kantisto ne scias kanti")

30.8.2009

Konfidenca edzo

Ŝolem, judo el Bjalistoko, fanfaronis al sia amiko:

"Dum la lastaj 20 jaroj mi ne estis kun virino."

Ekmiris la amiko: "Kaj kion diras pri tio via edzino Bluma?"

Ŝolem: "Ĉu mi devas ĉion rakonti al mia edzino?"