5.1.2011

Trompi judon?

Katoliko iras al sia preĝejo por konfesi siajn pekojn.

Li diras al la pastro: "Patro, mi pekis. Mi trompis judon."

Pastro (post iom da silentado): "Tio ne estas peko. Tio estas miraklo."

(dankon al Max el Ĉeĥujo)

9.1.2011

Elefantoj kaj judoj

Profesoro de zoologio havis tri asistantojn: germano, franco kaj israelano.

Li donis al ili taskon: verki raporton pri la heredeco de la elefantoj.

Post tri monatoj la franco liveris al li 50-paĝan raporton kun la titolo "La sekseco ĉe elefantoj".

Post kvar monatoj la germano transdonis al la profesoro raporton de 500 paĝoj: "La organizado ĉe la elefantoj."

Post ses monatoj alvenis la israelano kun raporto de 2,000 paĝoj, kies titolo estas: "La elefantoj kaj la juda-palestina problemo."

(dankon al Claus el Germanujo)

12.1.2011

Serĉas edzinon

Anonco en usona juda gazeto:

Mi estas 34-jara fraŭlo: sukcesanta, diligenta, vigla kaj memstara. Mi serĉas junulinon, kies patro dungos min.

(dankon al Barry el Usono)

16.1.2011

Ĉu vi dormas?

– Jakobo, ĉu vi dormas?

– Ne, mi ne dormas.

– Bonvolu prunti al mi mil zlotojn.

– Mi profunde dormas.

(dankon al Teddy el Israelo)

19.1.2011

Li dormas rapide

Oni rakontis, ke la tre fama rabeno, Gaono Eliahu el Vilno (1720-1797), dormis tre malmulte dum la nokto (du horojn, kvar horojn ktp - ekzistas diversaj versioj…).

Foje unu el liaj konatoj demandis lin: "Rabeno, kial vi dormas tiom malmulte?"

Respondis la Gaono: "Nu, ekzistas homoj, kiuj legas rapide, kaj mi apartenas al tiuj, kiuj dormas rapide."

23.1.2011

Denove pri dormo de rabeno

Rabeno: "Mi dormas 6 horojn tage."

Lernanto: "Kaj nokte?"

26.1.2011

Mesaĝo al Dio

Dum la soveta tempo ruso, litovo kaj judo volis aniĝi al la Komunista partio.

De ili estis postulata plenumo de nur unu tasko: direkti al la ĉielo pugnon kun elŝovita polekso (signo de moko, malrespekto). Tio por montri, ke ili ne kredas je ekzisto de Dio.

La tri kandidatoj venis antaŭ la komisiono. La ruso kaj la litovo tuj montris pugnojn ĉieldirekten, kaj sekve ili tuj estis membrigitaj al la Komunista partio.

Sed la judo rifuzis tion fari kaj diris: "Ho, kial mi devas montri tien la pugnon, se tie estas nenio?“

(dankon al Max el Ĉeĥujo)

30.1.2011

Filinojn aŭ monon

Du lernantoj de rabena lernejo interdiskutas:

Diras Reuven (Ruben): "Diru al mi Jona, kion vi ŝatus havi: 7 filinojn aŭ 7 milionojn da dolaroj?"

Jona: "Kia stulta demando! Kompreneble 7 milionojn!

Reuven: "Malbone, ĉar se vi havus 7 milionojn da dolaroj, vi certe dezirus havi pli multe. Sed se vi havus 7 filinojn, tiam vi certe ne dezirus havi pli…"

(Dankon al Nina el Pollando)