1.7.2009

Enkonduko

Ekde la 18-a jarcento plifortiĝis la sekulariĝo kaj eĉ la asimiliĝo (parta aŭ plena) ĉe la judoj: unue en okcidenta Eŭropo (ĉefe Germanujo) kaj poste en aliaj mondpartoj.

Unu el la karakterizaĵoj de la komenco de tiuj procedoj estas adopto de valoroj, kutimoj kaj normoj - kulturaj, religiaj kaj aliaj - kiuj apartenas al la nejudaj najbaroj.

Kristnaska abio

Tio okazis je Kristnasko ĉe parte asimiliĝinta juda familio en Munkeno.

La familio feste vespermanĝis kaj en la ĉambro staris lumigita kristnaska abio.

La eta filo Hans-Abrahamo rigardas la belan abion kaj demandas la patron: "Paĉjo, ĉu ankaŭ la kristanoj lumigas ĉi-vespere la abion, same kiel ni faras?"

5.7.2009

Enkonduko:

Ni scias ke kontraŭ stereotipoj kaj prajuĝoj ne eblas batali…

Unu el la konataj stereotipoj rilate judojn estis la opinio de la nejudaj popolamasoj, ke ĉiuj judoj naskiĝis "komercistoj", ke ili ĉiam elturniĝas facile rilate monon ktp.

Jen tiutipa ŝerco, tutcerte verkita de nejudo…

Elturniĝemaj judoj …

Nejuda domposedanto, loĝanta ter-etaĝe, luigis la supran etaĝon al juda familio, kiu havis multajn infanojn. Post iom da tempo tre ĝenis lin la bruo de la infanoj marŝantaj super lia kapo. Li menciis tion al sia luanto, kiu respondis, ke se troviĝus en la ĉambro tapiŝo, tiu-ĉi absorbus la paŝan bruon. "Sed mi bedaŭrinde ne estas sufiĉe riĉa por aĉeti tapiŝon", li aldonis. Tiam la posedanto donacis al la judo la bezonatan monon por aĉeti tapiŝon. Iom da tempo poste la bruo malaperis. Iun tagon, kiam la gojo eniris la loĝejon de sia juda luanto, li rimarkas ke… tute ne estis tie tapiŝo. Li demandis pri tio la luanton, kiu respondis, ke multe pli urĝis aĉeti novan vestaĵon por la edzino. Tiam ĉiuj familianoj ricevis pecon da dika ŝtofo, prenitan el la malnova patrina robo kaj algluitan sub iliaj hejmaj ŝuoj. Kaj de tiam ne plu estis bruo…

(dankon al Daniel el Svisio)

8.7.2009

Kadre de la ŝercoj pri judaj komercistoj, negocado kaj marĉandado:

Marĉandema paciento

Juda komercisto vizitis faman kuraciston.

Post la konsulto li elpoŝigis kaj surtabligis 3 rublojn.

Kuracisto: "Sinjoro Kremer, por konsultado mi ricevas 10 rublojn!"

Kremer: "Kaj mi aŭdis de homoj, ke vi postulas pagon de 5 rubloj…"

12.7.2009

Filo de komercisto

En la klaso demandas la instruistino al la juda knabo:

"Se via patro pruntedonos al alia komercisto 150 rublojn je 12% jare, kiom da rubloj li gajnos dum unu jaro?"

Mojŝe: "Almenaŭ 50 rublojn."

Instruistino: "Vi ne kapablas kalkuli!"

Mojŝe: "Mi kapablas kalkuli tre bone, sed mi vidas, ke vi tute ne konas mian patron!…"

15.7.2009

Peza kesto en vagonaro

Tio okazis en la trajno iranta de Tiraspol al Kiŝinevo.

Ruso eniris vagonon kaj vidis, ke sur la sola libera sidloko kuŝas granda kesto, tuj apud juda pasaĝero.

Ruso: "S-ro judo, deprenu la keston de la benko, ĉar mi ne havas sidlokon!"

Judo: "Lasu min. Mi ne deprenos la keston de la benko!"

Ruso: "Skandalo! Se vi ne deprenos la keston, mi vokos la konduktoron!"

Judo: "Lasu min trankvila!"

Ruso: "Mi tuj vokos la konduktoron kaj ni jam vidos kiu pravas!"

(li foriras kaj revenas kun la konduktoro)

Konduktoro (al la judo): "Prenu la keston kaj metu ĝin sub la benkon!"

Judo: "Mi ne scias kial vi punas min. Ĉu mi pekis? Ĉu mi estas portisto aŭ sklavo? Kial vi ordonas al mi porti tiun ĉi pezan keston? Ĝi ne estas mia kesto!…"

19.7.2009

Karaj legantoj,

Bv. akcepti la lastan ŝercon antaŭ la kelksemajna somera libertempo.

Mi esperas renkonti kelkajn el vi dum la Universala Kongreso de Esperanto okazonta baldaŭ en Bjalistoko, la urbo en kiu oni rakontadis multe da judaj ŝercoj antaŭ pli ol 70 jaroj.

Ĝis la 23-a de aŭgusto!

Josi

(Mal)amo al judoj

Tio okazis en Francujo inter la du mondmilitoj. Maljuna judo, portanta du grandajn tekojn, eniras stacidomon en Tuluzo. Li aliras lokan viron kaj demandas lin: "Kion vi opinias pri la judoj?"

Tiam respondas la franco: "Oh, mi alte taksas la judojn. Ili havas belan kulturon!"

La judo trovas alian francon kaj prezentas al li la saman demandon. La viro respondas: "Mi tre amas la judojn. Ili estas talentaj kaj diligentaj!"

La judo serĉas alian viron kaj demandas lin: "Kion vi opinias pri la judoj?"

Respondas la franco: "Mi malamegas ilin, ĉiujn ilin!".

Tiam la judo diras al li: "Tre bone, sinjoro. Mi vidas ke vi estas honesta homo. Bv. do fari al mi komplezon kaj gardi miajn tekojn dum mi iros al la necesejo."