La Edukada Servo de I-LO en Tarnovo
Materialoj por geliceanoj |
LIBRO DE L’ HUMORAĴOAŭtoro: Paul de Lengyel |
©2024 Geo |
La Enhavo |
Patrino, kiam vi ternas, kien malaperas la terno, kiun vi ĵus eligis?
– Ĝi iras en la aeron, mia filo.
– Kaj se pro ia kaŭzo ĉesiĝas la terno?
– Mi ne scias, mia filo. Lasu min trankvila.
– Diru, ĉu ĝi reiras tien, de kie ĝi komencis elveni?
– Estas eble. Sed nun eliru kaj ludu ion..
– Je tia okazo vi devas ĝin alifoje elterni; ĉu ne vere?
– Verŝajne…
– Ĉu vi ne ternos plu, kiam vi estos elterninta ĉiujn viajn ternojn enhavataj en via korpo, aŭ ĉu vi ricevos novajn ternojn?
– Vilhelmo, ne turmentu min per viaj demandoj. Mi diras al vi, eliru…
– De kio devenas la terno?
– Mi ne scias… Vilhelmo mia, jam… –
– Kio kaŭzas, ke iuj homoj, kiam ili ternas, diras ”hap-ci”, kaj aliaj ”hap-cu”?
– Vilhelmo, se vi ne eliros tuj…
– Mi tuj eliros. Patrino mia, Petro diris, ke, se mi donos al li moneron, li ternos per sia orelo. Ĉu tio estas kredebla?
– Ne, tio ne estas ebla.
– Ĉu vi certe scias, ke tio ne estas ebla?
– Jes, mi certe scias. Sed nun ne demandu plu, ĉar…
– Kiu klarigis vin pri tio ĉi?
– Pro la ĉielo! mia filo, silentu!
– Kara mia patrino, en kio konsistas la terno?
– Vilhelmo, se vi eldiros eĉ unu vorton…
– Kio okazos, se mi eldiros ankoraŭ unu vorton? Ĉu vi volas terni?
Vilhelmo senprokraste sciiĝis pri ĝi. Li plore ekkriis pro ricevo de ŝatinda vangofrapo.