Mikaelo Bronŝtejn (ruse: Михаил Бронштейн) naskiĝis la 7-an de julio 1949 en urbo Ĥmelnickij, Ukrainio. Li finis Politeknikan instituton en urbo Tula kaj havas specialecon – teknikisto-cibernetikisto. En 1981–1991 loĝis en Vorkuta kaj laboris en minejo "Komsomolskaja". Nun li estas ĉefa energetikisto de uzino "Galant" en apudpeterburga urbo Tiĥvin.

Esperantistiĝis en 1961. Havis diversajn gvidajn funkciojn en Sovetia Esperantista Movado. Verkis kaj tradukis multajn kantojn, kiujn mem prezentas al la Esperanto-publiko. Estis eldonitaj "samizdate" multaj aŭtoraj kantaroj. La plej konata el liaj tradukoj estas "Graf' Nulin" de Aleksandr Puŝkin, en almanako "Impeto'89" (eldonejo "Progreso", Moskvo) samtempe aperinta sur disko "Eterna muziko" (Leningrado, 1988). En 1992 en la eldonejo "Impeto" aperis lia libro "Legendoj pri SEJM".

M. Bronŝtejn estas gvidanto de literatura klubo de "Moskva Gazeto".