Antaŭparolo

Kara leganto!

Verŝajne vi mire demandas vin, kial mi tradukis en Esperanton la romanon de Nikolaj Ostrovskij Kiel ŝtalo estis hardata. Ja krom Ostrovskij la sovetia literaturo havas multajn elstarajn verkistojn.

El ĉiuj ceteraj verkoj mi elektis nome tiun ĉi, ĉar ĝi evidente estas unu el la plej popularaj kaj ŝatataj ne nur inter sovetia junularo, sed ankaŭ inter junuloj de multaj aliaj landoj.

La aŭtoro priskribas heroecan batalon de ruslanda junularo por la sovetia potenco. En tiu batalo niaj gejunuloj estis fordonintaj ĉiujn fortojn, ili oferis siajn vivojn por venko de la revolucio. Ili timis neniujn obstaklojn: malsaton, malvarmon, la plej malfacilajn kondiĉojn de laboro kaj severajn atakojn de malamikoj.

La lando estis travivanta malfacilegan tempon: mankis nutraĵoj, vestoj, hejtaĵo, estis grandparte detruita industrio, kaj trafiko ne povis priservi bezonojn de la juna respubliko. Tamen niaj gejunuloj plej aktive partoprenis en la batalo kontraŭ malamikoj.

La aŭtoro konatigas nin kun rimarkindaj reprezentantoj de la juna generacio, kiu por la efektivigo de socia egaleco, por la frateco kaj justeco oferas sian personan feliĉon, sian certan kaj trankvilan vivon; ĝi senrezerve estas fidela al laborista klaso, al la partio de Lenin, batalante ankaŭ kontraŭ perfiduloj kaj oportunistoj.

Ostrovskij talente pentras sian ĉefan heroon Paŭlo Korĉagin, kiu malgraŭ la terura malsano, kateninta lin al la lito, malgraŭ turmentaj doloroj kaj blindeco, kreas sian verkon por laŭeble helpi sian popolon. Dank’ al siaj neordinaraj volforto kaj persisto, kaj precipe al kredo je justo de siaj ideoj, li sukcese finis sian laboregon pri la libro.

La herooj de Ostrovskij servas kiel bona ekzemplo kaj modelo de eltenemo, rezisto kaj sinoferemo en la batalo por la hela futuro, por la paco, por feliĉo, frateco kaj egaleco sur nia tuta planedo.

Mi ne dubas, ke la ekssovetiaj esperantistoj ĝojos pri apero de tiu ĉi libro en Esperanto, kaj alilandaj esperantistoj kun intereso konatiĝos kun heroa batalo de nia junularo.

Solomon Cins