Mi jam decide volis iri en la departementon, sed diversaj kaŭzoj kaj meditadoj detenis min. Pensoj pri la hispanaj aferoj ĝis nun ne povis forlasi mian kapon.

Kiamaniere dona povas fariĝi reĝino? Oni ne permesos al ŝi heredi la tronon; unue Anglujo ne permesos kaj krom tio la politikaj aferoj de tuta Eŭropo, – la hindo-hungara reĝo ne permesos, nia reĝo… Mi konfesas, ke ĉiuj ĉi aventuroj tiel min zorgigis kaj mortigis, ke mi dum la tago tute ne povis ion fari.

Eĉ Maŭro al mi rimarkigis, ke mi, tagmanĝante, estis tre zorgoplena. Kaj precize tiel estas: mi, ŝajnas al mi, estante en distreco, du telerojn faligis sur la plankon, kaj ili tuj rompiĝis. Post la tagmanĝo mi iris al la montoj, sed trovis tie nenion lernindan.

Plejparte mi kuŝis sur la lito kaj meditadis pri la hispanaj aventuroj.