Mi hodiaŭ dum la tuta mateno legis gazetojn. Eksterordinaraj aferoj okazas en Hispanujo. Mi eĉ ne povis bone kompreni ilin. Oni sciigas, ke la hispana trono estas forigita, kaj tial ranguloj, elektante heredanton, trovas sin en embarasa situacio, kaj tial do okazas ribeloj. Ĉiuj ĉi okazoj ŝajnas al mi tre strangaj. Kiel do povas esti forigita la trono? Oni diras, ke iu dona devas heredi la tronon. Dona ne povas heredi tronon, tute ne povas. Heredi tronon devas reĝo. ”Sed”, oni diras, ”reĝo ne ekzistas”. Ne povas esti, ke reĝo ne ekzistu. Regno ne povas esti sen reĝo. Reĝo ekzistas, sed li kredeble trovas sin ie kaŝita. Li eble sin trovas ie, sed iuj familiaj kaŭzoj, aŭ timoj de la flankoj de najbaraj regnoj, ekzemple de Francujo, aŭ de aliaj, devigis lin kaŝi sin, aŭ pri tio estas aliaj kaŭzoj.