Ankaŭ bufo kaj rano estas tre similaj, sed ne unu sama speco de besto. Ambaŭ estas senvostaj amfibioj. Ambaŭ dependas de akvo por reproduktiĝo. Ambaŭ sin nutras per insektoj kaj vermetoj, kiujn ili kaptas per longa, muskola lango. Ambaŭ spiras parte per pulmoj, parte per la haŭto. Ambaŭ havas proksimume la saman grandecon: ili varias de 1 centimetro ĝis 30 centimetroj. Ekzistas miloj da specioj da bufoj kaj ranoj.

Ambaŭ reproduktiĝas per la sama procedo: fekundigo okazas ekster la korpo de la gepatroj. La idoj vivas, komence, ekskluzive en akvo, spiras per brankoj kaj havas voston, sed ne krurojn.

Tamen, estas diferencoj inter ili. La plej videbla diferenco estas la membranoj inter la fingroj, kiujn rano posedas, sed ne bufo. Ankaŭ la saltado de rano estas multe pli potenca: ĝi povas atingi 150 centimetrojn da longo kaj 70 centimetrojn da alto. Bufoj apenaŭ saltas kelkajn centimetrojn.

Bufo havas organon sub la ventro, kie ĝi konservas venenon por sindefendo. Tiu venenaĵo ne estas mortiga por homo, sed povas kaŭzi lokan inflamon. Ankaŭ pro tio homo ne manĝas bufon, kutime. Rano ĝenerale ne estas venena (nur kelkaj specioj de ranoj produktas toksajn substancojn), tial homoj kutime manĝas ĝian viandon. Oni eĉ konstruas ran–bredejojn por grandkvanta produktado.

La haŭto de bufo estas malglata, kun multaj veruk–formaj glandoj. +La haŭto de rano estas glata.

Kvankam ambaŭ forte dependas de akvo por reproduktiĝo, tamen bufo vivas plej ofte sur seka grundo, dum rano, ĉe la bordo de rivero aŭ lago.

Bufo simbolas jen fekundecon, abundecon kaj prosperon, jen magion kaj sorĉon.