|
NAIVA MUSO
Sub-tegmentejon iris mus',
Tre juna kaj sen-sperta.
Sur-loke renkontiĝis ĝi,
Imagu, kun vesperto.
Ek-tremis surprizita mus'
Kaj, reveninte kelon,
Ravite flustras al patrin':
– Mi vidis ĵus anĝelon.
NE KAPTU BIRDOJN!
Paseretoj gaje saltas.
Pro ekscito kato haltas.
– Huŝ, ĉasist', ne kaptu birdojn:
Ili hejme havas idojn!!!
MALKONTENTA KATO
Se ek-mastras hejme rato,
Invitata estas kato.
Se troviĝas hejme lakto,
Oni min for-pelas. Fakto!
Homoj agas ne-normale!
Ĉu ne devus esti male?
PASERO
Ĝin timigas nek la frost',
Nek la pluv', nek la pluv'.
Ĉiu flako estas kuv' -
La ban-kuv', la ban-kuv'.
Nestas ĝi en sub-tegment',
Sub ĉevron', sub ĉevron',
Inter mura ruĝa brik' -
Ĉik-ĉirik! Ĉik-ĉirik!
PELIKANO
Pelikano – bird' solena -
Naĝas ĉe la rand' basena.
Okulo – ronda kiel groŝo,
Longa beko, sub ĝi – poŝo.
ARDEO
Kiom da kruroj havas ardeo? -
Sci-volas Mateo.
– Ĉu unu? Ĉu du?
– Du!
– Ĉu tio en-tute eblas?
– Jes ja: la dua malofte videblas.
ARBARA KURACISTO
Se en arbaro malsanas frakseno,
Pino aŭ kverko, jam tuj de mateno
Venas helpanto en ruĝa ĉapeto.
Ŝelon de l' arbo esploras beketo.
Tute sen-paga kuraco kaj flego!
Dankon al kiu adresi? – Al pego.
ZOO-STUDO
Supre kaj malsupre – plado,
Tute ronda, kiel rado,
Laŭ la sabla voj' moviĝas.
Kap', piedoj videbliĝas.
Tute simpla zoo-studo:
Temas, knaboj, pri?.. – testudo.
ĈU?
Bunt-vostan ekvidinte pavon,
Helenjo atentigas avon:
"Rigardu! – kriis la nepino,
– Belege floras la kokino!"
ENIGMOJ
1
Kio ĝi estas, amik' Anastaso?
Du fratoj-ĝemeloj sid-rajdas sur nazo.
(okul-vitroj)
2
Kun-frapante la flugilojn,
Brue saltas sur barilon
Vek-horloĝ' ĉe ava domo.
Kia estas ĝia nomo?
(koko)
3
Plektante reton en angul',
Ĝi ŝvitas kaj baraktas,
Sed fiŝojn – je honora vort'! -
Per reto ĝi ne kaptas.
(araneo)
4.
Ronda, flava, sed ne varma,
Sur la kapo kreskas sun'.
Kio estas ĝi? Divenu!
Eble diros vi, Judrun?
– Lasu min pripensi, Franto...
Ha, ĝi estas helianto!
5
Multajn pinglojn sub piceo
Trovis Petro kaj Andreo.
Kiu perdis? Jen enigmo!
De la spuroj mankas signo.
– Eble, estis sub piceo
Erinaca tra-noktejo?
|
