Erni Krusten, merita verkisto de la Estona SSR, estas unu el la plej elstaraj majstroj de la estona prozo. Li naskiĝis la 30-an de aprilo 1900 apud Tallinn en ĝardenista familio kaj ankaŭ mem laboris kiel ĝardenisto. En 1920 li komencis provi literaturan verkadon. Lia unua libro aperis en 1927. De tiam li verkis multe kaj estas ankoraŭ nun, en respektinda aĝo, produktiva majstro de la vorto, okupiĝante ĉefe pri mallongaj prozaĵoj.

E. Krusten aperigis jenajn kolektojn de miniaturoj, rakontoj kaj noveloj: "Eriko" (1927), "Blinda amo" (1941), "Turnpunktoj" (1946), "En la nonio de la paco" (1951), "Enterigo de la vipo" (1957), "Malfeliĉa amo" (1957), "Serĉante printempon" (1960), "Maljuna fripono" (1966), "Tre malbona takso" (1967), "Kvin historietoj" (1968), kaj la rakonton "Okupacio" (1969).

Aperonta estas nova libro, "Soifanto de ĝojo". Krom la nomitaj aperis kolekto de prozaj miniaturoj kaj poeziaĵoj "Manihoto" (1963) kaj pluraj romanoj: "Serĉante la pasintecon" (1928), "La amo de Org Magedi" (1939), "Libro pri Peks'oj" (1946), "La koroj de gejunuloj" I—II (1954—1956) kaj "Kiel guteto en maro" (1962). Li verkis ankaŭ la teatraĵojn "Mi vivas" (1956) kaj "La amerikanoj venis" (1959) kaj librojn por infanoj.

La verkoj de Krusten estas trasorbitaj de humanismo. Lin karakterizas bonhumoro, ofte eĉ inkliniĝo al satiro. Li estas konsiderata kiel kulturanto de mallongaj prozaĵoj, miniaturoj kaj fragmentaĵoj en la estona soveta literaturo. Pro liaj lirikismo kaj rakontmaniero oni iam kaj tiam komparas lian talenton kurt tiu de I. Turgenev.

La romaneto "Okupacio", kiu ricevis jaran premion de la Estona SSR por 1969, apartenas al liaj plej bonaj lastatempaj verkoj. Ĝia agado okazas dum la germana okupacio de Estonio en 1941—1944. Sub lia majstra plumo viviĝas la pezeco de l' okupacio, ĝia senlima nehumaneco, la subpremado de vere homaj sentoj kaj idealoj, pereigo de homeco. La aŭtoro konvinkas, ke eĉ en tiaj cirkonstancoj ne malaperas homaj sentoj kaj pensado, ke precipe en peze premanta atmosfero manifestiĝas la virtoj kaj malvirtoj de la homo eksterordinare klare.

Multaj verkoj de Erni Krusten estas tradukitaj en la rusan lingvon kaj aliajn lingvojn de Sovet-Unio, same en la finnan, hungaran, bulgaran k. a. lingvojn.