John Ruskin naskiĝis en la jaro 1819 en London. Lia patro estis bone instruita kaj sufiĉe riĉa, kaj lia patrino estis tre inteligenta kaj ĉarma virino. Ŝi mem instruis la knabon dum lia frua infaneco, zorgeme aranĝante liajn taskojn, horojn de studado kaj amuzadon. Li havis malmultajn ludilojn kaj ne ofte ludis kun aliaj infanoj, donante la plejparton de sia tempo al legado de elektitaj libroj.

Post kelkaj jaroj li komencis akompani la patron, kiu, kiel agento por vinberista firmo, multe vojaĝis. Tio donis al la knabo okazon, vidi belajn pejzaĝojn kaj viziti pitoreskajn kastelojn. La patro montris al li la pentraĵojn en multaj famaj pinakotekoj kaj inspiris al li tian komprenon pri arto, arĥitekturo kaj iliaj rilatoj al la naturo, ke li poste fariĝis fama verkisto pri la arto kaĵ la naturo.

Inter liaj pli gravaj verkoj estas Modernaj pentristoj, en kvin volumoj, La ŝtonoj de Venecio kaj La lumoj de arĥitekturo; de 1860 ĝis sia morto en 1900 li verkis ankaŭ librojn pri sociologio kaj politika ekonomio.

Li verkis la rakonteton La reĝo de la Ora rivero en la jaro 1841, responde al peto de juna knabino kaj nur por ŝia amuzado. Sed iom pli poste, kiam iu amiko sugestis, ke oni presigu ĝin, li ne rifuzis permeson al la eldonistoj.

Washington, Novembro 1910
Ivy Kellerman