La Uzado De La Sufikso "EBL".

Ŝtalo estas fleksebla.	Vitro estas travidebla kaj rompebla.	Ne ĉiu kreskaĵo estas manĝebla.
Gaso aŭ aero ne estas palpebla.	Nekredebla historio.	Enirebla loko, sed ne elirebla.
Sukero estas solvebla en akvo, sed kupro ne.	Akvo ne estas bruligebla fluido, sed alkoholo jes.	Ĉu vi amas vian patron? Kompreneble, mi lin amas.

La Uzado De La Sufikso "EM".

Timema knabo.	Batalema knabo.
Bonfarema viro.	Manĝema viro.
Spionema virino.	Kaŝema viro.
Avarema viro.	Babilema birdo.

La Uzado De La Sufikso "IND".

Laŭdinda ago.	Admirinda konstruaĵo.
Kompatinda birdo.	Ridinda situacio.
Timinda drako.	Aminda infano.
Mirinda fosilio.	Forĵetinda verkaĵo.

La Uzado De La Prepozicio "DA".

Pomo.	Multe da pomoj.		Akvo.	Glaso da akvo.
Pano.	Peco da pano.		Sukero.	Kilogramo da sukero.
Libro.	Nombro da libroj.		Forko.	Dekduo da forkoj.
Drapo.	Metro da drapo.		Birdo.	Kelke da birdoj.

LA RUZA VULPO.

Malsata vulpo serĉas manĝaĵon. Ĝi eniras kokidkorton, sed la kokidoj estas en la kaĝo. Ĝi penas trarampi, sed la malfermaĵoj estas tro malgrandaj.

Subite la vulpo ekflaras fromaĝon. Ĝi sekvas la odoron per sia nazo, kaj jen ĝi vidas, ke granda nigra korvo enflugas la korton kaj ekkaptas per sia beko grandan pecon da fromaĝo el la ratkaptilo, kiu staras apud la kaĝo.

La korvo tiam rapide forflugas kaj sidiĝas sur la branĉon de apuda arbo. La vulpo alproksimiĝas la arbon kaj diras: "Ho, kiaj belaj plumoj vin ornamas, kaj viaj okuloj kiel steloj brilas."

La korvo estas tre kontenta kaj fiere elmontras siajn plumojn, sed firme tenas la fromaĝon. La vulpo daŭrigas: "Vi estas la plej bela birdo, kiun mi iam vidis. Mi aŭdis, ke vi ankaŭ kantas tre bele. Ekkantu do por mi kanteton." La vanta korvo malfermis la bekon por ekkanti kaj la fromaĝo elfalis el ĝia beko kaj falis en la buŝon de la vulpo.